Sirta Nolosha: Sideed ku ilaashan kartaa muuqaalkaada dhalinyaranimo?

Qeybta 1aad....

Gabowgu waa marxalad da’eed oo soo marta aadanaha markasta oo uu sii noolaado sanado fara badan, waana mid lagama gudbaan ah. Balse qormadan ugama hadli doono sida aad cimrigaada ku gaabin karto ama saacadda ku joojin karto, waxaanse si faah faahsan uga hadli doonaa hababka ugu habboon ee muuqaalkaada uga yaraan karo da’daada, ama aan si kale u dhahee muuqaal dhalinyaro uyeelan kartid adigoo da’daada ka weyntahay dhalinyar.

Inta badan qormadan waxaan ka soo xigtay xarumo kala duwan iyo bugaag ay qoreen khubaro dhanka caafimaadka ku xeel dheer oo arrintan si fiican u lafa guray. Waxaana ku soo koobayaa 15 sir oo kaa saacidaya muuqaal da’ya inaad yeelato adigoo cimrigaagu weynyahay.

Waxa ayna ku bilaabanayaan sida:-

Sirta 1aad: Guurso (sameey Galmo xalaal ah)

Dareenka nolosha xaasnimo waxa uu xoojiyaa qiimaha nafsadeed iyo raaxada jirka, iyadoo cimriga horay usocoshadiisa uu keenayo in maqaarka miineysto.

Galmo joogto ah oo habeysan waxa ay jirka siineysaa shaqo buuxda iyadoo hubanti ka dhigeysa adkeynta xiriir lamaane farxad leh.

Waxa ay yareysaa hurda la’aanta, walwalka, madax iyo dhabar xanuunka iyadoo keenta sii deynta xanuun baabi’iye dabiici ah oo uu jirku sameeyo (natural opiates). 

‘‘Haweenka galmada xiiseeya waxa ay noolaadaan nolol dheer’’,  sidaasi waxaa yiri Mehmet Oz, MD , oo ah professor iyo ku xigeenka madaxa qeybta qaliinka ee New York Presbyterian–Columbia University, ahna mid kamid ah labada nin ee qoray buugga YOU: Being Beautiful, waxa uu intaa sii raaciyay: ‘‘laba jibbaaridda galmada lagu qanco waxa ay noloshaada ku kordhin kartaa 3 sanadood. Galmadu waxa ay ku siineysaa waqti ama ahamiyad gaar ah oo aadan ka heli karin maalinta dhan’’.

Sirta 2aad: Debci wejigaada

Murqaha wejiga oo la dabciyo waxa ay ku filanyihiin jilcinta xariiqimaha kadkaduudka iyo welwelka. Fariiso ama u seexo qaab aad ku raaxeysaneysid kaddibna xir indhahaada.

Niyaddaada ka saar fikirka welwel iyo buuq, kaddibna xoogga saar neefsashadaada ama tiri neef qaadashadaada. Iska dhig sida qof aan wax murug ah heyn, wejigaadana ka saar dareenka, si deggen uga neefso sanka 3 ilaa 5 daqiiiqo.

Dhoolacaddeey inta badan waqtigaada. Sida uu sheegay qoraaga buugga: الإبتسامة الساحرة Caadif Abulciid, diraasad lagu sameeyay dalka masar ayaa lagu xaqiijiyay in weji macbuusnimada ay saameyn xun ku reebto ama soo dedejiso soo bixidda kadkaduudka ama miinta wejiga, gaar ahaan indhaha hareerahooda, diraasadda ayaa lagu sheegay in dhoolacaddeyntu ay tahay hubka ugu weyn ee looga hortago weji kaduudka, ama ugu yaraan dib udhigeysa soo bixiddooda.

Dhoolacaddeyntu waxa ay dhaqaajisaa lix muruq oo wejiga ku yaal, balse weji macbuusnimadu waxa ay dhaqaajisaa 72 muruq, taasoo si fudud u baabi’isa tamar fara badan, soona dedejisa in murqahaas awooddooda yaraato.

Sirta 3aad: Ha cabbin sigaar

Sigaar cabbiddu waxa ay keentaa cimri deg deg, iyadoo muuqaalka da’daada ku kordhisa 12 ilaa 15 sano. Marka aan leenahay sigaar cabbid waxaan ula jeednaa buurida ama tubaakada, sigaarka, shiishadda, iwm. Waa habka labaad ee maqaarka u dedejiyo gabowga marka laga soo tago ilayska loo yaqaan Ultra Violate.

Sirta 4aad: Qaado hurdo fiican

Hurdadu waxa ay lagama maarmaan u tahay dib u cusboonaashada iyo dib usoo laabashada unugyada jirka. Inta aad ku jirtid saacadaha hurdada hormuunka korriinshaha (the Growth Hormone) ee masuulka ka ah dib ucusbooneysiinta iyo dib usoo celinta maqaarka, tinta iyo lafaha ayaa la soo daayaa.

Sirta 5aad: Daliig cagahaada

Si aad u xaqiijiso hurdo macaan oo raaxo leh taasoo ka soo muuqata wejigaada subaxa dambe, cagahaada ku daliig saliid macsar diirran oo nadiif ah inta aadan seexan. 

La soco qeybta 2aad  iyo todobaadka dambe...